________________________________________
لاجل حبك صرت للناس شلال
ودمع العين من فركاك شلال
واذا حبك بحر وتصير شلال
اصيرلك جبل وتنزل عليه
**********************
جاري الاتصال وياك جاري
ويمن حبك نهر بالروح جاري
تمنيتك الكلب يمك وانت جاري
احني الباب والحايط سوية
**********************
تموت الروح حبيبي بعدكم
وريح المسك ماراحت بعدكم
ترى يالعزيز شماطال بعدكم
تظل انت حبيبي وغالي عليه
*********************
اريد امشي نهار الصيف واسعى
وعلى ابو حلك الصغيرون وعين وسعه
يا حفار القبر بالله عليك وسعه
بلكي تصير موتتنه سوية
********************
وحق كل من غنت الاطلال وانساك
ماتحلى الليالي بغير ونساك
وصوتك مو مثل كل صوت وانساك
ولا مر النسيان بيوم بيه
*******************
لغيرك مانبض كلبي ولا دك
ثكيل وياك ميزاني ولا دك
لغيرك بعد ما ارمش ولا ادك
واريد اليوم الكعده وياك سوية
********************
دخنت من التتن دنهل وسومر
وحتى كلبي من هواكم زنجر وسومر
احبك من عهد بابل وسومر
ولك حتى حمورابي انكسر كلبه عليه
***********************
احبك حب ماينوصف وصفه
وعليك الكلب مثل الذهب وصفه
عليمن يكتب الدكتور وصفه
عيونك والشفايف صيدلية
*********************
حبيبي المانشد عني ولا سال
دمعي ماجرى لغيره ولا سال
اخبرك لا مرض بيه ولا سل
لكن فركتك عمّت عليه
*********************
حبيبي شبعد منزلك عني ودارك
وشنو اللي غير اطباعك ودارك
اريد اوصل لعتبة بابك ودارك
اخاف اعدي وتصير المنيه
